Европската Комисија (ЕК) предлага да се обезбедат три милијарди евра за поддршка на десет земји од нејзиното непосредно соседство, вклучително и Северна Македонија. Од таму сметаат дека ваквиот пакет е потребен за да се ограничат негативните економски и социјални последици од здравствената криза со коронавирусот.
За Северна Македонија, ЕК предлага да се издвојат 160 милиони евра, за Албанија – 180 милиони, за БиХ – 250 милиони евра, за Косово 100 милиони евра и за Црна Гора – 60 милиони евра. Надвор од земјите од Западниот Балкан, европската извршна власт смета дека ќе бидат потребни 150 милиони евра на Грузија, 200 милиони евра на Јордан, 100 милиони евра за Молдавија, 600 милиони евра за Тунис и 1,2 милијарди евра за Украина.
Ова е дел од новата стратегија позната како „Тим Европа“ на Европската Унија, чија цел е да се помогне на земјите партнери.
„Европската солидарност не застанува во границите на Унијата. Затоа што во оваа глобална криза стоиме или паѓаме заедно. Денеска Европската Комисија презема одлучен чекор да им помогне на десет од нашите соседни земји во нивната борба против коронавирусот. Ги повикувам Европскиот Парламент и Советот брзо да се усогласат околу овој важен пакет“, изјави еврокомесарот за економија, Паоло Џентилони.
Фондовите би биле на располагање дванаесет месеци во форма на заеми „со многу добри услови“ за да се помогне на земјите за поткрепа на итните финансиски потреби, за стабилизирање на макроекономската состојба и за ублажување на негативните социоекономски последици од здравствената криза, вели ЕК.
Предлогот сега треба да биде прифатен од страна на Европскиот Парламент и Советот на ЕУ, како две ко-одлучувачки тела на ЕУ. Комисијата бара од двете институции итно да дадат зелено светло.
Првата транша би се ослободила штом биде усвоен предлогот, а втората транша од септември или на почетокот на 2021 година, „доколку политичките мерки поврзани за неа се имплементирани навремено“, смета Комисијата.