Во средата „раскина“ во Санкт Петербург за денеска да биде промовиран во Рим. Роберто Манчини (53) и официјално ја презеде фудбалската репрезентација на Италија, откако минатата недела се раздели со рускиот премиерлигаш Зенит. На кормилото на „азурите“ ќе биде во наредните две години со задача да ги врати на старите славни патеки. Опции за неговото работно место беа и Карло Анчелоти, Антонио Конте и Луиџи ди Бјаџо.
Манчини, според договорот, ќе инкасира два милиона евра плус бонуси. Тој доаѓа на местото на Џанпјеро Вентура кој во декември доби отказ по елиминацијата од Шведска во бараж двомечот за Светското првенство во Русија.
Италија е прв репрезентативен ангажман за Манчини кој во досегашната тренерска кариера водеше само клубови. Почна во Фиорентина, заврши во Зенит, а во меѓувреме беше на клупата на Лацио, на Интер (во два наврата), на Манчестер сити и на Галатасарај. Како фудбалер во периодот од 1984 година до 1998 година забележа 36 натпревари за „азурите“ пришто постигна четири гола.
Манчини ќе дебитира на италијанската клупа во претстојните пријателски мечеви против Саудиска Арабија на 28 мај, против Франција на 1 јуни и три дена подоцна против Холандија.