Дебитантот на Светските првенства го запре двократниот светски шампион. Исланд одигра 1:1 против Аргентина во Москва за прв резултатско изненадување на мундијалот во Русија. Агеро обезбедо водство за „гаучосите“ во 19 минута, само четири минути подоцна возврати Финбогасон и докрај промена немаше. Аргентинците го имаа поседот на топката, но определбата да влезат со неа во мрежа им се удри од глава. Не успеаја посериозно да го загрозат голот на Халдорсон од игра, а не успеаја ниту од белата точка во 64. минута. Меси промаши пенал што го изнуди Меза нути, пак, од неколку обиди од слободен удар и се самопромовира во трагичар на мечот.
https://www.youtube.com/watch?v=I3RE-2tj9D0
Исланѓаните одиграа како што се договорија во соблекувална. Свесно ` препуштија на Аргентина да игра додека беа максимално концентрирани и дисциплинирани на „бункерот“ пред сопствениот гол што го подигнаа од самиот почеток. Намерата за прва реализација на СП ја бараа преку контри. Искористија една што им беше доволна да останат непоразени со стерилниот ривал од Јужна Америка чии фудбалери премногу се потпираа на ѕвездата на Барселона и со бесконечни и безидејни додавања не успеаја да го пробијат дефанизвниот блок на селекцијата од европскиот север.
Во групата Д вечерва и натпреварот меѓу Хрватска и Нигерија од 21 часот.
Аргентина – Исланд 1:1 (1:1)
Стадион: „Откритје арена“ во Москва. Гледачи: 44.190. Гл. судија: Симон Марцињак. Асистенти: Павел Соколницки и Томаш Листкиевиц (сите тројца од Полска). Ж. картони: /. Стрелци: Агеро 19’ за Аргентина; Финбогасон 23’ за Исланд.
Аргентина (формација 4-2-3-1): Кабалеро – Салвио, Отаменди, Рохо, Таљафико – Маскерано, Биља (Банега 54’) – Меза (Игуаин 84’), Меси, Ди Марија (Павон 75’) – Агеро. Селектор: Хорхе Сампаоли.
Исланд (формација 4-5-1): Халдорсон – Магнусон, Р. Сигурдсон, Арнасон, Севарсон – Бјарнасон, Халфредсон, Г. Сигурдсон, Гунарсон (Скуласон 76’), Гудмундсон (Гисласон 63’) – Финбогасон (Б. Сигурдсон 89’). Селектор: Хеимир Халгримсон.