ПСЖ се провлече неказнет во Неапол и „безбедно“ го напушти „Сан Паоло“, Тотенхем „оживеа“ за осминафинале, Мауро Икарди се погрижи за Интер да остане непоразен на домашен терен. Ова се белези на мечевите од четвртата рунда во А-Г групниот сегмент во фудбалската Лига на шампиони по кои нештата во некои конкуренции се разјаснија додека во некои се замрсија пред двете завршни кола.
Атлетико Мадрид може да се пофали дека е првиот тим што успеа да ја надигра Борусија Дортмунд во оваа сезона. Составот на Диего Симеоне ги совлада „милионерите“ со 2:0 и бодовно се израмни со нив на табелата во А групата за, речиси, европска пролет во еминентното УЕФА натпреварување. Саул во 33. минута и Антоан Гризман во 80. минута погодија за „јорганџиите“ за слатка одмазда за убедливиот пораз пред две недели на „Вестфален“. Бриж во вториот меч во групата го декласира Монако на „Луј Втори“ со 4:0 со два гола на Ванакен во 12. минута и во 17. минута од пенал, по еднаш во листата на стрелци за запишаа Весли во 24. минута и Вормер во 85. минута.
Се што беше вредно за одбележување на „Џузепе Меаца“ се случи во финишот. Интер и Барселона поделија по бод во меѓусебниот судир (1:1), откако Малколм погоди за Каталонците во 83. минута, а израмни Мауро Икарди во 87. минута. Тимот на Ернесто Валверде во Милано ја немаше поддршката од Лионел Меси кој, сепак, не настапи поради скршеницата на раката иако беше дел од експедицијата. Тотенхем, пак, го слави Хари Кејн со чиј двострел „спарси“ направија пресврт против ПСВ Ајндховен на „Вембли“ и ги оживеаја надежите за нокаут фазата во ЛШ. Напаѓачот на премиерлигашот и на англиската репрезентација реализира во 78. минута и во 89. минута како одговор на голот на Де Јонг од втората минута на средбата.
Наполи пропушти неколку прилики за голем триумф над ПСЖ и на крајот мораше да се задоволи со бод во дуелот со скапиот тим од „Паркот на принцевите“. Бернат „стрелаше“ во продолжението на првиот дел за водсто на францускиот претставник што го анулира Лоренцо Инсиње од белата точка во 63. минута. Иако наполитанците имаа време за втор гол и неколку одлични шанси, сепак, Џанлуиџи Буфон не дозволи да биде совладан до крајот. Црвена звезда во Белград успеа да приреди сензација со победата над актуелниот европски вицепрвак со 2:0 со двата гола на Милан Павков во 22. минута и во 29. минута.
Двата меча во групата Д донесоа победи на домашните екипи. Порто на „Драгао“ триумфира над Локомотив Москва со 4:1 додека Шалке во Гелзенкирхен беше подобар од Галатасарај со 2:0.
Лига на шампиони, 4 коло
Група А
Монако – Бриж 0:4, Атлетико Мадрид – Борусија Дортмунд 2:0
Табела: Борусија Дортмунд 9, Атлетико Мадрид 9, Бриж 4, Монако 1.
Група Б
Интер – Барселона 1:1, Тотенхем – ПСВ Ајндховен 2:1
Табела: Барселона 10, Интер 7, Тотенхем 4, ПСВ Ајндховен 1.
Група Ц
Црвена звезда – Ливерпул 2:0, Наполи – ПСЖ 1:1
Табела: Ливерпул 6, Наполи 6, ПСЖ 5, Црвена звезда 4.
Група Д
Шалке – Галатасарај 2:0, Порто – Локомотив Москва 4:1
Табела: Порто 10, Шалке 8, Галатасарај 4, Локомотив Москва 0.