Задоволство, но и пораки за приземност од таборот на ЖРК Вардар по фуриозниот настап против Астраханочка во Скопје во четвртото коло во Лигата на шампиони. Вкупно 32 победа во натпреварувањето, трета во серија, беше изразена со 39:25. Денешната игра и резултат, сепак, не смеат да „опијат“. Првата цел за овој период од сезоната, место во наредната фаза, е исполнет меѓутоа до примарната, пласман на Фајналфор, има уште доста. Следен на менито на вардарки е Ференцварош во Будимпешта пред гостувањето и кај Лајпциг во завршната рунда.

„Добро, победивме, но не смееме да „летаме“. Она за што е пред нас е ФТЦ. Во Унгарија ќе биде многу тешко. Овој меч го искористивме за подготовка за тоа што нè очекува. Имавме добри моменти, но и пропусти во одбрана. Сите мислиме „уау“, ја победивме Асттраханочка со голема разлика, но ајде да одиме полека, чекор по чекор. Имаме квалитет и амбиции за фајналфор, а не да победуваме екипи што на хартија се послаби од нас“, порача Црногорката Јованка Радичевиќ, стрелец на девет гола против Астраханочка.

Фото: zrkvardar.mk
Фото: zrkvardar.mk

Внимателен и Давид Дејвис за кого дуелот со рускиот шамион беше дебитантски како прв тренер во ЖРК Вардар и воопшто во неговата кариера.

„Можам да кажам дека одигравме добро, но и да бидам искрен и да кажам дека на моменти грешевме. Заморот, се чини, се одрази во нашата игра во периоди од средбата, можеме и повеќе да трчаме. Зад се четири меча, пред нас се многу повеќе и потешки. Затоа е потребно сите ракометарки да бидат подготвени. Ротиравме доста, направивме и измени во системот на игра и мислам дека сме на добар пат да ја пронајдеме физиономијата од минатата сезона. Ова е само прв чекор. Мора да биде уште подобро“, нагласи Дејвис.