Вардар му возврати на ППД Загреб за прекинот на победничката серија во првиот дел од сезоната и се врати на чело на табелата во групата Б во ракометната Лига на шампиони (ЛШ). Македонскиот првак подобар од хрватскиот со 25:20 во десеттото коло во елитното натпреварување и одново е во игра за директен пласман во четврт-финалето.
„Црвено-црните“ имаат 14 бода колку и Кјелце, но предноста да бидат лидери во конкуренцијата во однос на Полјаците ја носи и позитивата во меѓусебните дуели и подобрата вкупна гол-разлика. Алекс Душебаев беше најефикасен на средбата со седум гола, Карачиќ и Циндриќ постигнаа по четири. Најмногу погодоци за поразениот тим даде Марковиќ (6).
„Честитки за моите ракометари. Одиграа супер, победија, сега се први и време е малку да уживаме. Игравме добро во првото полувреме, во одбрана бевме како што сакаме, искористивме многу напади и направивме добра разлика. Можеби не задржавме ритам во продолжението, се соочивме со одредени проблеми во играта седум на шест, но тешко е да се игра со Загреб на исто ниво во тек на сите 60 минути“, рече Раул Гонзалез, тренер на Вардар, кој против „плинарите“ не можеше да смета на Вуко Борозан.
Денешниот триумф на вардарци е седми во сезоната, вкупно 38 во ЛШ. Победата против „плинарите“ ја обезбедија во првото полувреме. Добриот перформанс во одбрана, интервенциите на Штербик и одличната реализација на нападите придонесоа за 14:8 на полувреме.
Вториот дел, за еден гол (11:12), им припадна на гостите од Загреб меѓутоа победата не беше загрозена во ниту еден момент од средбата. И покрај пројавените осцилации, сепак, генералниот впечаток е дека двата бода се одбранети рутински. Во наредното коло Вардар ќе гостува во Унгарија кај ПИК Сегед.
„Одигравме одлично прво полувреме и добар дел од второто. Во завршниот дел направивме грешки кога тие почнаа да напаѓаат со седум ракометари. Но, издржавме. Задоволни сме од победата и се вртиме кон дуелот со ПИК Сегед“, истакна Алекс Душебаев.
Вардар – ППД Загреб 25:20 (14:8)
Сала: „Јане Сандански“ во Скопје. Гледачи: 4.500. Судии: Курсад Ердоган и Ибрахим Оздениз од Турција.
Вардар: Штербик, Ангелов, Стоилов 1, Недановски, Фереира Мораеш, Македа 1, Деревен 1, Карачиќ 4, Душебаев 7, Абутовиќ, Канелјас, Циндриќ 4, Чупиќ 3, Дибиров 2, Шишкарев 2, Марсениќ. Тренер: Раул Гонзалез.
Седмерци: 1/1. Исклучувања: 6 минути. Технички грешки: 14.
ППД Загреб: Стевановиќ, Скок, Ерес, Мраковчиќ 3, Контрец, Вори 2, Марковиќ 6, Хорват 2, Шушња, Ј. Валчиќ 2, Т. Валчиќ, Мандалиниќ 1, Миклавчич 2, Маркоски, Павловиќ 2, Векиќ. Тренер: Силвио Ивандија.
Седмерци: 5/6. Исклучувања: 2 минути. Технички грешки: 19.