Ракометарките на ЖРК Вардар ќе играат во второ финале во низа во Лигата на шампиони. Актуелниот европски вицепрвак ја оправда фаворитската улога во дуелот со Ростов и со конечни 25:19 (полувреме 10:7) закажа пресметка со Ѓер што ќе биде реприза на ланскиот меч за титулата и одлична прилика за одмазда за минималниот пораз по продолженија.
„Црвено-црните“ беа доминантни во „Ласло Пап арена“ во судирот до рускиот дебитант од Дон, силно тргнаа и држеа константа во текот на сите 60 минути. Ростов налета на ѕид уште од воведот на средбата. Поведе од пенал во првата минута и на вториот гол (прв од игра) чекаше до деветтата. Во меѓувреме вардарки нанижаа шест гола, резултатски се одлепија и до крајот не дозволија да бидат изместени од победничкиот курс.
Андреа Пенезиќ и Андреа Лекиќ постигнаа по седум гола, Јованка Радичевиќ додаде четири, Барбара Лазович заврши со три погодоци, противничката мрежа по еднаш ја тресеа Андреа Чанаџија и Сара Ристовска. Одлична на голот на ЖРК Вардар беше Амандин Лејно. Перформансот на репрезентативката на Франција беше фрустрирачки за Ростов. Финишира со 18 интервенции и може да се прогласи за најзаслужна за пласманот во ново шампионско финале иако импонираше и комплетната игра во одбрана на тимот на Ирина Дибирова кој капитулира само 19 пати.
Ѓер во првото полуфинале триумфира над ЧСМ Букурешт со 26:20.
Финалето меѓу ЖРК Вардар и Ѓер е утре попладне (18 ч.), ЧСМ Букурешт и Ростов од 15.15 часот ќе разигруваат за бронзениот медал.