Кадетската репрезентација на С. Македонија ја забележа првата победа на Светското ракометно првенство за играчи до 19 години во Скопје. Во меч од второто коло во групата Ц е совладана Нигерија со 37:34 (полувреме 18:16), но освен резултатот, до драстично поправање на впечатокот по неочекуваниот пораз од Аргентина на стартот не дојде. Со ваквата констатација е согласен и селекторот Данило Брестовац кој нема одговор за грчот што го манифестираат неговите избраници.

„Победа е победа, но ова не е екипата што ја подготвувавме толку време. Две години работам со ракометарите, но ваква психолошка блокада во главите во два меча во низа досега немале. Играме со 20 отсто од реалните можните. Освен Костески, никој друг не беше на потребно ниво. Анализирам и укажувам на грешките, но повторно се провлекуваат. Немаме агресивност во нашата игра, едноставно не сме свои“, коментира Брестовац.

Прв стрелец во триумфот над Нигерија беше Костески кој постигна 13 гола, Серафимов додаде 10. Најефикасен во поразената селекција беше Екподио со 11 погодоци.

Нареден ривал на македонските ракометни кадети ќе биде Бахреин (СЦ „Борис Трајковски“, петок, 20.30 ч.).

СП во ракомет (У19) во машка конкуренција

Група А, 2 коло

С. Арабија – Словенија 22:30

Чиле – Хрватска 21:43

Норвешка – Шпанија 28:28

Табела: Хрватска 4 бода, Словенија 4, Шпанија 3, Норвешка 1, С. Арабија 0, Чиле 0.

Група Б, 2 коло

Канада – Унгарија 13:41

Тајван – Шведска 18:48

Египет – Франција 24:28

Табела: Унгарија 4 бода, Франција 4, Шведска 2, Египет 2, Тајван 0, Канада 0.

Група Ц, 2 коло

Нигерија – С. Македонија 34:37

Аргентина – Данска 19:29

Бахреин – Јапонија 27:24

Табела: Данска 4 бода, Бахреин 2, С. Македонија 2, Јапонија 2, Аргентина 2, Нигерија 0.

Група Д, 2 коло

Португалија – Србија 22:21

Бразил – Исланд 26:30

Тунис – Германија 15:36

Табела: Исланд 4 бода, Португалија 4, Германија 2, Србија 2, Бразил 0, Тунис 0.