Бројот на активни случаи на ковид-19 во земјава се зголемува. Според вчера објавените податоци од Институтот за јавно здравје (ИЈЗ), активни се 6.395 случаи од кои најголем број во Скопје – 3203. Во Куманово има 455 активни случаи, во Велес – 328, во Прилеп – 257, во Битола – 216, во Кавадарци – 211, во Штип – 207, во Охрид – 192, итн.
Од Министерството за здравство (МЗ) соопштија дека во текот на завчерашниот ден се аплицирани вкупно 6.089 дози на вакцини од кои 709 како прва доза, 1.148 се ревакцинирани, а 4.232 граѓани примиле трета доза вакцина.
Заклучно со 26 октомври, вкупно се вакцинирани 802.705 граѓани, ревакцинирани се 772.424, а трета доза примиле 20.119 граѓани.
Педесет и четири отсто од граѓаните над 40-годишна возраст се ревакцинирани, а 33 отсто од популацијата од 18 до 39 години примиле барем една доза вакцина. Опфатот со вакцинација со една доза на вакцина, на полнолетната популација е 57 отсто, а со две дози опфатени се 46 отсто од граѓаните над 18 години. Според бројот на аплицирани вакцини, 38 отсто од целата популација во нашата земја е вакцинирана, а 35 отсто од популацијата во државата примила две дози вакцина, информираа од МЗ.
Досега во земјата се направени вкупно 1.372.834 милиони тестирања на ковид-19. Вкупниот број ковид-дијагностицирани лица во земјава од почетокот на епидемијата изнесува 200.856, бројот на оздравени пациенти е 187.374, а на починати е 7.087.