Претседателот на Словачка, Андреј Киска предложи предвремени избори или големи промени во Владата, како излез од политичката криза предизвикана од убиството на истражувачкиот новинар Јан Куцијак и неговата девојка.
Владата на премиерот Роберт Фицо е пред колапс откако неговиот коалициски партнер побара предвремени избори поради масовните протести во Братислава.
По осумчасовни преговори, партијата „Мост- Хид“ инсистираше на договор со коалициските партнери за да се закаже вонредно гласање, или во спротивно најави напуштање на Владата.
Премиерот Фицо, кој е на власт една деценија, се обидуваше да ја задржи стабилноста на својата Влада. Сепак поради политички притисок, оставки поднесоа неколку министри од кабинетот.
Коалицијата на Фицо има 78 пратенички места во Парламентот со 150 членови. Покрај предвремените избори, опозицијата бара и гласање за недоверба на владата на Фицо. За да ја урнат им се потребни 76 гласа. За да се распишат предвремени избори, потребни се 90 гласови.