Филип Миркуловски го откажа настапот на Светското првенство во Германија, а на скратениот список на машката ракометна репрезентација на Македонија нема уште петмина кои досега беа стандардно повикувани. Селекторот Раул Гонзалез ќе работи за 22 играчи на подготовките што се закажани на 24 декември (понеделник) во Скопје.
Покрај организаторот на играта на Вецлар, за мундијалот отпадна и Немања Прибак од Бешикташ. Дел од националниот тим за претстојниот турнир во Германија и во Данска од 10 до 27 јануари нема да бидат ниту левото крило на Еурофарм Работник, Гоце Ојлески, неговиот клупски колега и кружен напаѓач, Никола Маркоски, голманот Јане Цветковски од Вецлар и вардаровиот бек Мартин Мишевски.
Планирано е целиот тек на подготовките да се реализира во Скопје. До заминување за Германија се предвидени и два контролни меча со селекцијата на Србија на домашен терен. Македонија на СП 2019 ќе игра во групата Б во Минхен заедно со Шпанија, со Словенија, со Исланд, со Бахреин и со Јапонија.