Индустрискиот сектор во Европа започна да ја намалува побарувачката за природен гас, бидејќи рекордните цени го направија тој енергенс недостапен за многу корисници. Просечната потрошувачка во октомври беше 12 проценти помала отколку пред пандемијата, според податоците собрани од консултантската агенција Engie EnergyScan со седиште во Париз.
Потрошувачката на гас почна да опаѓа во септември и беше за пет проценти помала отколку во истиот месец во 2019 година, јави „Блумберг“.
Во индустрискиот сектор во Европа, постои тренд на намалена потрошувачка и побарувачка за гас, вели директорот на Engie EnergyScan, Жулиен Аро.
Според него, намалувањето на потрошувачката досега е најочигледно во Германија, во Холандија и во Велика Британија, но треба да се почека неколку недели за да се види дали навистина ќе биде така кога ќе се зголеми побарувачката во грејната сезона.
Непосредно пред почетокот на зимата, цените на природниот гас достигнаа рекордни нивоа. Одредени енергетски интензивни компании привремено престанаа да работат, бидејќи нивното одржување станува прескапо. Кризата ги зафати и снабдувачите со енергија и влијае врз потрошувачите во Европа.
Референтниот договор за гас неодамна беше повлечен со надеж дека Русија ќе го зголеми износот на испораките. Сепак, цените на гасот се и понатаму четирипати повисоки.
Високите цени може да го забават економското закрепнување во Европа, бидејќи одредени гранки на индустријата веќе се тешко погодени, заклучи Аро.