За Нова ТВ од Букурешт: Сашко Ѓ. Димовски
Еден пораз не смее да ја напушти атмосферата во репрезентацијата. На настани како Европско првенство немате време за радување и ли тагување. Професионалци сме и против Украина ќе мора да ги искористиме позитивните моменти од дуелот со Австрија. На Европското првенство не дојдовме како туристи, поседуваме квалитет што очекувам да го демонстрораме и во утрешниот натпревар, порача заменик капитенот во фудбалската репрезентација на Македонија, Стефан Ристовски пред дуелот со Украина на Националната арена во Букурешт во второто коло во групата Ц на Европското првенство.
– Се може да се очекува денеска во модерниот фудбал. Австријците ги анализиравме многупати, па на крајот излегоа со пет дефанзивци плу Алаба. Анализирани се и Украинците и подготвени сме за двете нивни формации што најчесто ги користат. Ние ќе излезе на терен со желба да ја играме нашата игра и да стигнеме до поволен резултат. Со два блока и брзи контри можеме до победа против Украина, нагласи Ристовски.
Ристовски се осврна и на позицијата што му беше доверена во натпреварот со Австрија која не беше неговата природна на која сме навикнале да го гледаме.
– Не гледам на која позиција игра во националниот дрес. Како што реков, професионалци сме и концентриран сум и давам максимум на било која позицикја што се бара од мене. Така беше и во неделата против Австрија, само екипата да функционира како што треба, додаде Ристовски.
Меќот меѓу Македонија и Украина на ЕП 2020 е утре попладне (15 ч.) на Националната арена во Букурешт.