Над 70 борбени авиони од петтата генерација на Су-57 ќе бидат испорачани на руската армија до 2027 година, вклучително и неколку авиони во оваа година, соопшти руската државна технолошка корпорација „Ростек“.
„Ростек“ коментираше статија во американското списание „Нешнал Интерест“ (National Interest), во која се тврди дека е малку веројатно оти Су-57 ќе биде оперативен пред 2027 година, објави агенцијата ТАСС.

Руските авиони од петтата генерација прават Западот да не се чувствува удобно. Су-57 и новиот руски ловец често стануваат цел на лажни вести. Станува збор за неточни факти кои немаат никаква врска со реалноста. Авионот веќе се произведува и испорачува. До 2027 година ќе бидат испорачани повеќе од 70 авиони, а неколку веќе оваа година, се наведува во соопштението на „Ростек“.

Руската новинска агенција додава дека руската воздушна флота ќе добие 22 авиони Су-57 до 2024 година, а тој број ќе се зголеми на 76 до 2028 година.