Рокот за пријавување за гласање на лицата со Ковид-19 и во (само)изолација, на болните лица, на изнемоштените и на лицата со хронични болести завршува вечерва (8 јули) на полноќ. Лицата кои се позитивни на коронавирусот или се наоѓаат во изолација, освен со полномошник, за гласање ќе можат да се пријават и преку апликацијата на интернет страната на ДИК https://izolacija.sec.mk/.
Покрај копија од лична карта, лицата со Ковид-19 или во самоизолација до ОИК или преку апликацијата треба да достават и копија од решението за карантин или самоизолација издадено од Државен санитарен и здравствен инспекторат. Лицата чии резултати ќе бидат позитивни по 8 јули или ќе бидат ставени во самоизолација по овој датум, нема да може да се пријават за гласањето што за нив ќе се спроведе од посебни избрачки одбори на 13 јули.
Болните, немоќните и хронично болните ќе гласаат на 14 јули. И тие до ОИК треба да се пријават за гласање со доставување на соодветна документација. Последните податоци што ДИК ги објави за пријавени за гласање на 13 и 14 јули се од 6 јули напладне. Дотогаш за гласање биле пријавени само 19 лица со Ковид-19 и 1.1129 болни и немоќни лица.
Рокот за гласање на лицата во домашен притвор завршува на 11 јули. На 9 јули, односно утре завршува и рокот за пријавување на набљудувачи на изборите.
Кампањата трае до 12 јули на полноќ, по што настапува тридневен молк поради гласањето кое овојпат поради пандемијата со Ковид-19 започнува во понеделникот и тоа со лицата со Ковид-19.