Македонската машка ракометна репрезентација е на праг на уште еден голем завршен турнир во континуитет. Вечерва во СЦ „Борис Трајковски“ е совладана селекцијата на Романија со 32:24 за, без малку, формален реванш во среда во Клуж.
Очигледен беше одличниот скаутинг на Раул Гонзалез за натпреварот. „Црвено-жолтите“ беа одлично подготвени за првото полувреме од мундијалскиот предизвик и во целост се оправдаа како фаворити. Освен во воведот во кој имаа негатива од два гола, во сиот преостанат дел ги потиснаа Романците во подредена улога и немилосрдно го полнеа нивниот гол.
Решавачкиот период, се чини, се случи во првата половина од првиот дел. Македонија „врза“ осум гола, се одлепи на 8:2 и дилемите на чија страна ќе заврши мечот ги распрска на најситни парчиња. Чави Пасквал се обиде со тајм аут да ја прекине серијата, но залудно. Домашните на полувреме заминаа со плус пет (15:10), до крајот додадоа уште три и може слободно да се прогласат за учесници на турнирот во јануари во заедничка организација на Данска и на Германија.
Кире Лазаров беше најефикасен на средбата со осум гола, два повеќе од Дејан Манасков. Стојанче Стоилов додаде три, а голем удел во убедливиот триумф имаше голманот Борко Ристовски со своите 15 интервенции. Прв стрелец во поразената репрезентација беше Дан Емил Ракотеа со пет погодоци, еден повеќе од Валентин Маријан Јонеа.
Баражи за СП 2019 во Данска и во Германија
Резултати, први мечеви
Македонија – Романија 32:24
Србија – Португалија 28:21
Белорусија – Австрија 28:28
Литванија – Исланд 27:27
Словенија – Унгарија 24:29
Хрватска – Црна Гора 32:19
Норвешка – Швајцарија 32:26
Холандија – Шведска 25:24
Литванија – Чешка 27:26