Бугарската компанија Булгаргаз ЕАД доби известување дека испораките на природен гас од Гаспром експорт ќе бидат суспендирани од утре 27 април 2022 година.

Бугарската страна целосно ги исполнила своите обврски и навремено, строго и во согласност со договорот и неговите клаузули и ги извршила сите плаќања.

По анализата на државната компанија Булгаргаз и Бугарскиот енергетски холдинг (БЕХ) е откриено дека новата процедура за плаќање во две фази предложена од Русија не е во согласност со постоечкиот договор до крајот на оваа година и претставува значителен ризик за Бугарија.

Министерството за енергетика, Бугарскиот енергетски холдинг, Булгаргаз и Булгартрансгаз презедоа чекори за изнаоѓање алтернативни аранжмани за снабдување со природен гас и за справување со ситуацијата. Во моментов во Бугарија не се потребни рестриктивни мерки за потрошувачката.

Официјално е потврдено дека Русија денеска престана да испорачува гас и на Полска. Оваа информација на прес-конференција ја потврди полската министерка за клима и животна средина Ана Москва, јави Би-Би-Си.

„ПГНиГ (Полската државна компанија за снабдување со гас) денеска доби информација дека рускиот гас повеќе нема да доаѓа преку гасоводот Џамал“, соопшти Москва.

„Добивме закани од Газпром“

Таа додаде дека Полска е подготвена за таа ситуација.

По состанокот со германскиот канцелар Олаф Шолц, полскиот премиер Матеуш Моравјецки потврди дека Полска претходно „добила закани од руски Газпром“.

Од Русија се уште нема официјална потврда за прекинот на испораките на гас, односно дали тоа е исполнување на заканата што претходно ја упати до сите „непријателски“ земји кои одбиваат да го платат рускиот гас во рубљи.