Шефот на руската дипломатија Сергеј Лавров изјави дека Москва ќе протера 60 американски дипломати откако Вашингтон нареди иста мерка за руски дипломати по нападот со нервен агенс врз рускиот шпион во Лондон.
Лавров рече дека Русија исто така ќе го затвори американскиот конзулат во Санкт Петерсбург.
Според Белата куќа, протерувањето на 60 американски дипломати од Русија не е неочекувано и САД ќе се справат со тоа.
Одлуката сепак дополнително ги влошува односите меѓу двете земји, истакна Белата куќа во соопштение.
Во исто време портпаролката на Стејт департментот Хедер Нојер изјави дека протерувањето на американски дипломати е неоправдано и Вашингтон го задржува правото да преземе соодветни мерки.
– Нема никакво оправдување за руската реакција, изјави портпаролката на брифинг со новинарите и додаде дека Москва одлучила да се изолира уште повеќе, со тоа што ќе протера 60 американски дипломати и го затвори конзулатот на САД во Санкт Петербург по идентичните мерки на Вашингтон поради аферата со труењето на поранешен руски шпион во Велика Британија.
– Од списокот што ни беше даден, јасно е дека Руската Федерација не е заинтересирана за дијалог за важните прашања за нашите две земји и ние го задржуваме правото да одговориме, рече Нојер.
САД заедно со 20 други нации наредија враќање на руски дипломати во земјата откако Москва беше обвинета за нападот врз поранешен руски двоен агент Сергеј Скирпал, и неговата ќерка.
Лавров пред неколку дена изјави дека одлуките на некои западни земји да протераат руски дипломати се донесени под притисок и уцени на САД.