Носителот на злато од СП 1997 и од Игрите во Сиднеј во 2000 година, Едуард Кокшаров, е назначен за нов селектор на машката ракометна репрезентација на Русија. Сопственикот на Вардар, Сергеј Самсоненко, пак, за координатор на машките селекции на „зборнаја“, но и за потпретседател на руската федерација. Ова се одлуки што беа донесени на денешната седница на Федерацијата во Олимпискиот комитет на Русија.

„Едуард прерасна во ракометен специјалист. Со успех ја извршува функцијата спортски директор во Вардар и во кариерата има освоено многу титули. Беше дел и од шампионската генерација на Игрите во Сиднеј. Му посакувам успех во работата и со националниот тим“, изјави Сергеј Шишкарев, претседател на ракометната федерација на Русија (ФГР).

Кокшаров ја започна ракометната кариера во тимот на СКИФ од Краснодар од каде во направи трансфер во Целје во сезоната 1999/00. Играше на позицијата лево крило и покрај двете најсјајни одличја на репрезентативен план има и на клупски со словенечкиот клуб во Лигата на шампиони во 2004 година. Освои и бронза на Олимпијадата во Атина во 2004 година и сребро на ЕП 2000 и на СП 1999. На два мундијала (2001 година, 2003 година) и на едно ЕП (2004 година) беше избран во идеалниот тим. Со Целје подигна осум шампионски трофеи во првенството на Словенија и пет во Купот.

Сергеј Самсоненко доби две функции за наредниот период. Потпретседателска во Федерацијата и кооординативна во руските машки селекции. Целта е дополнителен развој на ракометната игра на сите возрасни нивоа во земјата и пласман на А тимот на олимписките игри во Токио во 2020 година.

„Во минатата сезона дојдоа до полн израз неговите способности како ракометен менаџер и двете негови екипи постигнаа големи резултати. Машката на Вардар ја освои Лигата на шампиони, женската играше финале во елитното натпреварување. Долг период меѓусебно се „меркавме“, контактиравме и оставивме простор да видиме дали има „хемија“ во нашите односи и дали ќе може со здружени сили да работиме за доброто на рускиот ракомет. Сергеј Самсоненко ја прифати понудата што е од големо значење за нас. Задоволството е огромно што така талентиран раководител, со такви успеси во Европа ќе работи со нас“, додаде првиот човек на ФГР.