Генералниот секретар на НАТО, Марк Руте изјави дека новата команда на Алијансата во германскиот град Визбаден почна да ја координира западната воена помош за Украина.
Командата на НАТО во Визбаден за безбедносна помош и обука во Украина веќе почна со работа, истакна Руте.
НАТО ја презеде од САД координацијата со западната воена помош за Украина. САД помошта за Украина ја координираше од американската воздухопловна база „Рамштајн“, додека седиштето на новата мисија на НАТО во Украина е лоцирано во американската база „Клеј баракс“ во Визбаден.
Според западните медиуми, целта на преземањето е да се заштити механизмот за поддршка на Украина од НАТО-скептичниот новоизбраниот американски претседател Доналд Трамп
Администрацијата на претседателот во заминување Џо Бајден се обидува да испрати што е можно повеќе оружје во Киев поради загриженоста дека Трамп може да ги намали воените испораки за Украина.
Во својот прв претседателски мандат, Трамп се закани дека САД ќе ја напушти Алијансата и побара од сојузниците да издвојат три проценти од бруто домашниот производ.