Илјадници училишта во САД го одложија враќањето на учениците во клупи што беше планирано за оваа недела или се одлучија за онлајн настава, бидејќи бројот на случаи на ковид-19 достигна рекордно ниво поради ширењето на омикрон варијантата на коронавирусот.
Меѓутоа, официјални лица во некои училиштни области, сепак, инсистираа за отворање на училиштата, вклучително и во Њујорк, каде што минатата недела секое трето тестирано лице било позитивно на ковид-19, според вчера објавените податоци од градските власти.
Новиот градоначалник на Њујорк, Ерик Адамс, кој ја презеде функцијата викендот од Бил де Бласио, вети дека ќе го задржи отворен најголемиот училиштен систем во САД и покрај брзото ширење на вирусот.
Пред еден месец во градот имаше помалку од три проценти позитивни тестови, а сега ширењето на инфекцијата го наруши системот на јавниот транспорт, ги затвори претставите на Бродвеј и ги принуди компаниите да го одложат физичкото враќање на работните места.
Сакаме да бидеме исклучително јасни, најбезбедното место за нашите деца е училиштната зграда, истакна Адамс по посетата на основно училиште во Бронкс.
Брзината на ширење на омикронот создаде чувство на хаос на самиот почеток на 2022 година. Во последните седум дена, бројот на заразени случаи двојно се зголемил, достигнувајќи рекордни 418.000 дневно.
Многу други градови, како што се Милвоки, Кливленд и Детроит, воведоа онлајн настава или на сличен начин го откажаа враќањето на десетици илјади ученици на училиште оваа недела, повикувајќи се на недостиг на персонал и загриженост поради сојот омикрон.