Министерството за правда на САД соопшти дека се обвинети над 535 лица за немирите на 6 јануари во американскиот Капитол Хил. Во соопштението на Обвинителството на САД се наведува дека 495 лица се обвинети за влегување или останување во федералната зграда или простории, а 235 лица се обвинети за попречување, влијание или спречување на службеник при постапка или обид за тоа.
Најмалку 165 се обвинети за напад, отпор или попречување на службеници или вработени. ФБИ синоќа објави 11 нови видеа од осомничени за насилни напади врз полицајци за време на немирите во Капитол.
Од Обвителството, исто така, велат дека шест лица се уапсени под обвинение за напад врз припадници на медиуми или уништување на нивна опрема.
Сепак, Обвинителството наведува дека му е потребна помош од јавноста за да идентификува 300 лица за кои се претпоставува дека извршиле насилни дејства во Капитол Хил, вклучувајќи 200 кои нападнале полицајци.
Десет лица досега се изјаснија за виновни за различни обвиненија. Нападот предизвика штета од околу 1,5 милиони долари врз зградата на Капитол.