Агенти од американската Тајна служба синоќа го засолнија претседателот на САД, Доналд Трамп, во подземен букер кога стотици демонстранти се собраа пред Белата куќа да протестираат поради полициска бруталност и поради убиството на афроамериканецот Џорџ Флојд од страна на полицијата, пишува „Дојче Веле“.
Неименуван член од Републиканската партија изјави дека Трамп брзо е засолнет во подземен бункер поради демонстрациите пред Белата куќа, а тоа го потврди уште едно официјално лице. Наглата одлука на Тајната служба укажува на вознемирено расположение во Белата куќа во која можеле да се слушнат извиците од масата луѓе во паркот Лафајет, веднаш од спротивната страна, за време на целиот викенд, додека агентите од Тајната служба и полицијата се обидуваа да ги сузбијат демонстрантите.
Протести поради смртта на Флојд избувнаа ширум САД, а во главниот град започнаа од петокот, и оттогаш обезбедувањето во Белата куќа е засилено со Националната гарда и дополнителен персонал од Тајната служба и од полицијата.
Вчера Министерството за правда, исто така, распореди припадници од службата Маршал на САД и агенти од Управата за сузбивање на дрога (ДЕА) да ги засилат трупите на Националната гарда пред Белата куќа, изјави претставник на Министерството за правда.
Насилства избија во градовите ширум САД и на шестиот ден од протестите поттикнати од смртта на афроамериканецот Џорџ Флојд за време на полициското приведување во Минеаполис. Во речиси 40 града е воведен полициски час, но демонстантите го игнорираат во голема мерка што доведе до затегнати ситуации и конфликти со полицијата.
Во Индијанаполис, најмалку две лица загинаа по истрели на маргини на протестите во центарот на градот. Во Њујорк, два полициски автомобила влетаа во толпата демонстранти, кои претходно фрлаа со камења врз возилата. А во Чикаго, наводно, работното време на полициските службеници било зголемено на 12 часа за да се справат со ситуацијата.
Во Минеаполис, во државата Минесота, каде што почина Флојд, уапсен е возач на камион затоа што поминал низ оградата на патот и влетал во толпата демонстранти кои оделе по автопатот. Снимките објавени на социјалните мрежи покажуваат десетици луѓе собрани околу возилото кои го извлекуваат возачот надвор од камионот.
Тој подоцна е одведен во болница со полесни повреди, а не е пријавено дека во инцидентот има и други повредени. Гувернерот на Минесота, Тим Волц, изјави дека мотивот на возачот е нејасен и рече оти е зачудувачки тоа што не се случила трагедија и нема многу повредени.
