Копретседателката на „Зелените“, Аналена Бербок ќе биде нова министерка за надворешни работи на Германија, а со тоа и прва жена на таа функција во земјата, соопштија од нејзината партија.

Аналена Бербок на функцијата ќе стапи на почетокот на декември, како дел од владината коалиција формирана во средата заедно со социјалдемократите и либералите. „Зелените“ објавија дека и нивниот втор копретседател, Роберт Хабек ќе го предводи Министерството за економија и клима.

Според договорот „коалициски семафор“ за формирање на влада, Социјалдемократската партија на Германија (СПД) ќе добие шест министерства, „Зелените“ пет и Либералната демократска партија (ФДП) четири. Поранешниот вицеканцелар и министер за финансии, Олаф Шолц ќе биде првиот канцелар на Германија од редовите на социјалдемократите по 16 години.