Легендарниот напаѓач Самуел Ето (40) денеска поднесе официјална кандидатура за претседател на Камерунската фудбалска федерација. Тој пред новинаритe изјави оти е убеден во победа и покрај матните зделки и корупцијата на неговите противници.
Актуелниот претседател Мбомбо Нјоја беше е на чело на Камерунската фудбалска федерација од 2018 година, но неговиот избор на почетокот на оваа година го поништи Меѓународната спортска арбитража (CAS). Актуелното раководство му понуди потпретседателско место на Ето, но тој одби, истакнувајќи оти е дојдено време за обнова на камерунскиот фудбал.
Претседателските избори се закажани за 11 декември, а Камерун од 9 јануари до 6 февруари идната година ќе биде домаќин на Африканскиот Куп на нации.
Ето во својата фудбалска кариера настапуваше за европските гиганти Интер, Реал Мадрид, Барселона, Челзи и Евертон, а во националниот дрес одигра 118 натпревари на кои постигна 56 голови.