СДСМ денеска повторно го повика претседателот Ѓорге Иванов да го даде мандатот за формирање влада. Од партијата велат дека постои Програма на новото мнозинство што гарантира унитарност на државата.
„Оваа практика свесно кочење на демократските процеси во заштита на Никола Груевски и неколкумина негови соработници од соочување со правдата, оди на директна штета на граѓаните, кои чувствуваат штети врз нивните семејни буџети, а од понеделник голем дел од граѓаните во општините ќе останат без плати и потребните општински услуги. Никакво лицемерно лицитирање со датуми не е решение. Решение е да се даде мандатот, претседателот Заев да ја формира новата Влада и да се договори датумот за локалните избори. На граѓаните итно им е потребно смирување на општествено-политичката ситуација, стабилизација на државата, економски напредок и евро-атлснтски развој“, велат од СДСМ.
Од партијата додаваат дека секое евентуално натамошно одолговлекување и блокирање на демократските процеси е противуставно казниво дело бидејќи прави директна штета на државните и граѓанските интереси.