Кога се собраа во Скопје пред пет години си поставија неколку цели пред себе. Да бидат апсолутни владетели во домашната сцена, да го покорат регионот, а потоа и континентот. Ако првата се подразбираше по дифолт, а втората како покомплицирана, но, секако, достижна, тогаш останаа последната, најголемата, најпрестижната што е сон на секоја ракометарка. Титулата во Лигата на шампиони. Четири пати досега ја напаѓаа и при секој обид беа одвраќани. Трипати во полуфиналето и еднаш во финалето. Меѓутоа сите претходни Фајналфор турнири во Будимпешта по многу нешта се разликуваат од претстојниот. Најголемата е воедно и најемотивна и сублимирана е фактот дека е последен за актуелниот ростер пред најавеното летно распрскување „секоја на своја страна“.
Ракометарките на ЖРК Вардар попладнево од 18 часот во „Ласло Пап арена“ во унгарската престолнина ќе излезат на мегдан со дебитантот Ростов во второто полуфинале на завршниот спектакл во сезоната во елитното клупско натпреварување на ЕХФ. Во увертира на турнирот од 15.15 часот ќе играат ЧСМ Букурешт, победник во ЛШ во 2016 година, и актуелниот првак Ѓер.
„Ако го погледнете нивниот состав ќе видите дека имаат ракометарки со големо искуство и титули. Тоа што екипата е за првпат на Фајналфор не дозволуваме да нè залаже. Кога ќе дојдат вакви мечеви, најважно е да дадете максимум. Посакувам и верувам дека ќе успееме“, порачува Андреа Лекиќ која заедно со нејзините колешки Драгана Цвијиќ и Јованка Радичевиќ од наредната сезона ќе играат за ЧСМ Букурешт.
Ако во сезоната 2013/14 беа дебитанти и како целина немаа искуство на Фајналфор турнирите во ЛШ, во втората и во третата лошо го изменаџираа притисокот, лани беа на чекор до комплетирање на мисијата, но загубија од Ѓер во финалето со 31:30 по продолженија. Оваа сезона се пробија до Будимпешта на импресивен начин (13 победи и 1 пораз), за една години се повозрасни, позрели, поискусни и одлучни во намерата да докажат дека лекциите од минатото се научени, поуки се извлечени. Желби и мотиви, секако, не недостасуваат, особено што се ближи разделбата, како и решителност да покажат дека знаат, можат и го заслужуваат трофејот.
„Ростов е многу тим во играта „еден на еден“. Затоа мора да одиграме цврсто во одбрана што е најважен сегмент според мене. Цела сезона играме добро во дефанзива, се надевам дека ќе биде така и на овој Фајналфор. Мислам дека е клучна за секој тим. Кој има најдобра одбрана ќе триумфира и во Лигата на шампиони“, истакна Драгана Цвијиќ, единствената вардарка која се најде во Ол-стар тимот во Лигата на шампиони за оваа сезона.
Вардарки имаат два пораза во полуфиналните дуели од Будуќност (20:22, 17:27) и еден од ЧСМ Букурешт (27:21). Минатата сезона, конечно, успеаја да ја пробијат полуфиналната бариера по триумфот над романскиот состав (38:33) меѓутоа среќата, нервите, ладните глави и самодовербата беа на страна на Ѓер кој беше подобар за гол по екстра ракометот во „Ласло Пап арена“. Очекувањата од претстојното издание се однесуваат на хепиенд и заедничка забава на главниот скопски плоштад.
Фајналфор во Лигата на шампиони (ж)
Полуфинале 1: ЧСМ Букурешт – Ростов (сабота, 15.15 ч)
Полуфинале 2: Ростов – ЖРК Вардар (сабота, 18 ч.)
Меч за трето место: (недела, 15.15 часот)
Финале: (недела, 18 ч.)
Досегашни освојувачи на ЛШ по воведување на Фајналфор
2016/17 сезона – Ѓер (Унгарија)
2015/16 сезона – ЧСМ Букурешт (Романија)
2014/15 сезона – Будуќност (Црна Гора)
2013/14 сезона – Ѓер (Унгарија)