Новак Ѓоковиќ, вчера попладне, по шести пат во кариерата ја освои титулата на Вимблдон по победата во финалето над Италијанецот Матео Беретини со 3:1 во сетови. Со тоа, српскиот тениски ас се израмни со Роџер Федерер и Рафаел Надал, па сега сите тројца имаат по 20 гренд слем трофеи, но веќе на Ју-Ес опен ќе има прилика да ги престигне од најмалку две причини.
Првата – бидејќи оваа сезона е во одлична форма, а втората е бетонот во Њујорк што е негова омилена подлога. Мотив ќе бара и во непријатното ланско искуство на турнирот, кога со топче погоди судијка кој, пак, како покосен падна на теренот, па Американците го дисквалификуваа.
Но, тоа не е од статистиката по финалето на Вимблдон. Ѓоковиќ стана четврти тенисер во историјата со три освоени пехари на лондонската трева по Роџер Федерер, Бјорн Борг и Пит Сампрас, а само 10 тенисери во Опен ерата успеале да го одбранат веќе освоениот трон на All England Club.
Ѓоковиќ кон титулите на Австралија опен и на Ролан Гарос оваа сезона, ја додаде вимблдонската и стана прв тенисер по последните 52 години кој успеал да слави на првите три гренд слема во една календарска година. Тоа претходно му појде од рака на Род Лејвер во 1969 година, тогаш по вторпат во кариерата по 1962 година. И во двата случаја тој подоцна ја покоруваше конкуренцијата и на Ју-Ес опен.
Останатите тенисери кои триумфираа на сите четири гренд слем турнири во една сезона се Џек Крафорд во 1933 година, Дон Баџ во 1938 година и Лу Хоуд во 1956 година.
Ѓоковиќ е првиот тенисер кој по повеќе од десет години победил и на Ролан Гарос и на Вимблдон во иста сезона, по Рафаел Надал во 2010 година, а се додаде и во уште статистичка категрија. Србинот се придружи на Лејвер, Федерер и Борг како единствено во Опен ерата кои успеале со пресврт да стигнат до титула во едно лондонско финале.