Дислоцирање на Железарница, на Цементарница, бришење на јужната обиколница и хуманизација на Скопје, најави Петре Шилегов при гостувањето во „Само интервју“ на ТВ Канал 5. Актуелниот градоначалник на Скопје најави дека и останатата тешка индустрија ќе оди надвор од главниот град со донесувањето на новиот ГУП во 2022 година:
Во Генералниот урбанистички план што ќе биде донесен во 2022 година, во Скопје ќе нема ознака за изградба на тешка индустрија. Значи, тешката индустрија, во наредните 10 години, тука пред се мислам на комплексите на Железарница и на Цементарница, ќе мора да се исели. Тоа е хуманизација на просторот“, укажа Шилегов.
Запрашан „Каде да се исели? – Каде ќе ги носи?“, Шилегов одговори:
„Ќе биде сложена операција, меѓутоа, ако вие не предвидите ниту градба понатаму, ниту егзистенција, тоа ќе мора да влеземе во еден сериозен, општествено-државен процес за дислокација на тие капацитети. Тоа се разговори што од моја страна веќе се водени со раководствата и на Цементарница и на Железарница, да се соочат со тоа дека при носење на планот тоа што е таму едноставно ќе мора да престане да постои“, потенцира Шилегов.