Актуелниот градоначалник на Град Скопје и кандидат за втор мандат од редовите на СДСМ, Петре Шилегов во интервју за ТВ24 вели дека брзиот автобуски превоз (БРТ) ќе придонесе Скопје да ја добие најголема пешачка зона во Европа.
– За мене стандард за Скопје е кејот 13-ти ноември. Кој што беше, условно кажано панаѓурски, стана едно прекрасно шеталиште со слободен простор и изглед и квалитет и скопјани ја имаат можноста да уживаат во него. Тоа е нешто што сакаме да го мултиплицираме во најголемата пешачка зона. Кога ќе ги затвориме главните сообраќајни коридори од големиот ринг, вие ќе ја имате најголемата пешачка зона во Европа од Градска Болница до Палома Бјанка и од Стара Железничка до Бит Пазар, вели Шилегов.
Тој кажа дека единствените возила кои ќе можат да поминуваат низ оваа пешачка зона се оние на БРТ и техничкиот сообраќај.
– Зборуваме дека од Ново Лисиче до Ѓорче ќе идете за 35 минути со 23 станици, ќе знаете дека имате возила на секои три и пол минути, тоа ќе ви овозможи да си го испланирате времето што ви е потребно да стасате, тоа ќе дестимулира возење на автомобили, тоа ќе значи брз и евтин превоз, картата купена во кој било автобус ви важи во БРТ и обратно, тоа значи дека за 30 денари ќе можете да стигнете од едниот до другиот крај на градот, рече Шилегов.