Шкендија ќе патува на реванш во Хелсинки со одлична предност од Струмица. „Црвено-црните“ го совладаа финскиот претставник со 3:1 во првиот меч од второто квалификациско коло за Лига Европа за голем исчекор кон наредната рунда во второто по ранг натпреварување на УЕФА.
Хет-трик на „Младост“ попладнево постигна репрезентативецот Бесарт Ибраими кој двапати тресеше од белата точка (45 минута, 64 минута) и еднаш од игра (59 минута), по асистенција на Ферхан Хасани, за комплетирање на пресвртот. Единствениот гол за гостите беше дело на Осман Јалоу во 35 минута. Хелсинки имаше фудбалер ппомалку на теренот во втората половина од второто полувреме по исклучувањето Хани Патронен.
Реваншот во Финска е наредниот четврток, ждрепката за третото коло во Лига Европа е закажана за утре со почеток во 13 часот.
Шкендија – Хелсинки 3:1 (1:1)
Стадион: „Младост“ во Струмица. Гледачи: 1.500. Гл. судија: Маркус Хаметер. Асистенти: Кристијан Риглер и Роланд Ридел (сите тројца од Австрија). Ж. картони: Алими, Вујчиќ, Жуниор, Абдурахими (Шкендија). Ц. картон: Патронен (Хелсинки). Стрелци: Б. Ибраими 45′ (п), 59′, 64′ (п) за Шкендија; Јалоу 35′ за Хелсинки.
Шкендија (формација: 4-2-3-1): Захов – Мурати (Челиковиќ 25′), Цуцули, Бејтулаи, Тодоровски – Вујчиќ, Алими (Тотре 83′) – Жуниор, Радески (Абдурахими 75′), Хасани – Б. Ибраими. Тренер: Ќатип Османи.
Хелсинки (формација 4-3-3): Дане – Пиринен, Патронен, Јаласто, Рафиња – Далтрем (Обилор 67′), Анан, Оново – Пелвас (Менсах 76′), Саваж (Валенчиќ 78′), Јалоу. Тренер: Мика Лекосуо.