„One man show“ донесе дуелот меѓу Хјустон и Њујорк во последната вечер во НБА лигата за 2016 година. Го имаше Џејмс Харден кој не само што ги фрли во сенка актерите во мечот туку и на останатите пет што беа на програмата. „Ракетите“ ги совладаа „никси“ со 129:122 во најефикасниот дуел пришто популарниот „брада“ го забележа осмиот трипл-дабл во сезоната, втор во низа.

Харден уфрли неверојатни 53 коша против Њујорк (слободни фрлања – 16/18, за два поена – 5/10, за три поени – 9/16) што ги збогати со 17 асистенции и 16 скока. Бројките му обезбедија место во, и онака, богатата историја на американката професионална кошаркарска лига како прв играч со преку 50 поени и преку 15 скока и додавања во еден натпревар.

Двоцифрен ефект во три статистички категории оствари и Расел Вестбрук, моментно водечки за признанието МВП на лигата. Неговиот придонес во лесната победа на Оклахома над Лос Анџелес Клиперс (114:8) беше 17 поени, 14 додавања и 12 скока за најбрз трипл-дабл во НБА. Претходниот, (23 минути и 49 секунди) што исто така беше негова сопственост од дуелот со Л.А. Лејкерс, овојпат го подобри за 23 секунди.

НБА лига

Резултати

Сакраменто – Мемфис 98:112

Чикаго – Милвоки 96:116

Шарлот – Кливленд 109:121

Хјустон – Њујорк 129:122

Оклахома – Л.А. Клиперс 114:88

Јута – Феникс 91:86