По историскиот пласман на Фајналфор турнирот во Келн, вардарци и со историски пласман во финалето во елитното натпреварување на ЕХФ. Најголемиот успех од формирање на клубот и воопшто за македонскиот машки ракомет е остварен во дуел со деветкратниот европски првак, Барселона. „Црвено-црните“ го совладаа составот од „Блауграна“ со 26:25 (полувреме 13:12) и утре попладне (18 ч.) ќе играат против ПСЖ за преземање на тронот од Кјелце.
„Ова е остварување на нашиот сон. Одигравме токму онаков меч за каков се подготвувавме и очекувавме. Влеговме силно мотивирани во полуфиналето, максимално се вложивме и на крајот заслужено победивме“, рече хрватскиот репрезентативец, Лука Циндриќ кој го постигна победничкиот гол за вардарци во последната минута.
Честитки за херојската игра и победа заслужуваат сите „црвено-црни“ играчи во ростерот на Раул Гонзалез. Вардаровата чета функционираше беспрекорно и во ниту еден момент не беше инфериорна на теренот и во резултатско заостанување. Предноста од еден гол на паузата ја осигураа и на крајот за еуфорија на теренот, на клупата и на трибините во „Ланксес арена“ во Келн.
„Не размислувам на начин дали јас ќе ја одбранам титулата туку сакам Вардар да ја освои. Ако биде така на крајот ќе бидат најзадоволен. Против Барселона одигравме одлично и заслужено сме во финале како награда за сите нас“, истакна вториот Хрват во редовите на вардарци кој лани беше првак со Кјелце, а оваа година има прилика да остане на тронот со „црвено-црните“.
Арпад Штербик со нов одличен настап на голот. Шпанскиот репрезентативец, преведено со ракометен речник, ги „спушти ролетните“ за својот поранешен клуб и беше двигател за соиграчите на теренот по малата криза што ги зафати на почетокот.
„Не е лесно да се добие Барселона на домашен терен, а камоли на неутрален. Ова е голема победа. Одиме во хотел, да се одмориме и да се подготвиме за утрешниот предизвик“, истакна вардаровиот чувар на мрежата.