Час и половина пред да започне продолжението на расправата на Државната изборна комисија по приговорите за изборни нерегуларности на СДСМ, симпатизери на владејачката партија денеска повторно се собраа со цел како што велат „да ја одбранат државата“.
Протестот е продолжение на синoќешниот собир кој заврши доцна во утринските часови, а на кој се обраќаа високи функционери на ВМРО ДПМНЕ за „одбрана на волјата на народот“.
Имено меѓу присутните е потешко да се дојде до изјава, но сепак одбегнувајќи ги камерите, во разговор велат, не е својствено гласовите на Албанците да одат на контото на СДСМ, но дека Владата треба да ја формира лидерот на ВМРО-ДПМНЕ, Никола Груевски без разлика дали ќе коалицира со албанската 0ДУИ на Али Ахмети.
– Дојдовме овде да си ја земеме правдата во свои раце. Ова беа најрегуларните избори. Ќе седам ако треба цела година. Мене ме малтретираат две години за ова гласање. Верувам во другите институции но не и во Државната изборна комисија, вели еден од демонстрантите.
Во меѓувреме започна седницата на ДИК на која денеска ќе се расправа по останатите приговори на партиите БЕСА и СДСМ, откако ДИК отфрли седум приговори на БЕСА, а еден е се уште во процедура. Додека пак од СДСМ не беа прифатени три приговори, еден е во процедура, а за останатите четири ќе се расправа на денешната седница.