Откако опозицијата поднесе над 30.000 амандмани за Законот за употреба на јазиците, по непотпишувањето на законот од страна на Претседателот, пратениците во Собранието минуваат низ несогласувања и потешкотии за воопшто да расправаат по законот.
Тензијата се зголеми кога собранискиот спикер, Талат Џафери, не им даде право на процедурална забелешка на координаторите на пратеничката група, бидејќи како што рече тој, координаторот на пратениците на ВМРО-ДПМНЕ, Влатко Ѓорчев не бил присутен во Парламентот.
– По одржувањето на конгресот и формирањето на партиските тела, незванично ме известија од партијата дека работите во Собранието до званичо избирање на нов координатор, ќе ги координира пратеникот Владимир Ѓорчев. Истиот не е тука и немате право на процедурално, рече Џафери со што предизвика негодување кај пратениците од оваа партија.
Дел од нив станаа од своите места и излегоа на говорницата за да се разберат со Џафери.
Потоа пратеникот од ВМРО-ДПМНЕ, Илија Димовски, побара збор и го замоли Џафери во име на досегашната соработка да се држи, како што рече, до формално-правните обврски.
-Се наоѓаме во момент во кој сме збунети, толкав број амандмани и вие и СДСМ не можете да разберете дека треба да слушнете туѓо мислење, дека експертската јавност мисли поинаку од она што вие имате намера да го направите со Законот за јазици. Како долгогодишен колега ве замолувам да се држиме до форма. Точно е во смисла на тие разговори, но од формално правен аспект не е точно. Се уште немаме допис со промена на моделот според кој ќе функционираме како пратеници, рече Димовски.
Џафери продолжи со седницата и не им даде право на процедурална забелешка на неколкуте координатори на ВМРО-ДПМНЕ.
Се уште пратениците го немаат утврдено дневниот ред, бидејќи пратениците од ВМРО-ДПМНЕ постојано излегуваат и со процедурални забелешки бара поместувања или отфрлања на точки по што по секој предлог следуваат гласања кои опозицијата ги подржува, додека владејачкото мнозинство гиотфрла.