Бугарија е целосно подготвена да потпише договор со Република Северна Македонија и да започне со копање на граничниот железнички тунел што е можно поскоро, изјави бугарскиот министер за транспорт и комуникации, Гроздан Караџов, кој заедно со министерот за регионален развој и јавни работи Иван Иванов и министерот за одбрана Атанас Запријанов ги презентираа плановите за развој на Коридорот 8 пред амбасадорите на ЕУ и НАТО.
На настанот присуствуваа и претставници на Европската комисија, Националната компанија за железничка инфраструктура и Агенцијата за патна инфраструктура.
Вицепремиерот Караџов даде детални информации за железничките проекти на бугарска територија по Коридорот 8 и истакна дека прекуграничниот тунел помеѓу Бугарија и Северна Македонија не е само физичка врска помеѓу двете земји, туку и можност за непречено движење од Јадранското до Црното Море.
Чекаме одговор и коментари од Скопје за предложениот договор со цел да се испланира експертски состанок за да се разговара за него, нагласил Караџов.
Тој изрази подготвеност дека доколку Македонија нема забелешки во врска со документот, тогаш неговото потпишување ќе биде организирано веднаш. Според него, Бугарија може веднаш да започне со изградба на делницата која недостасува од 2,4 километри од Ѓуешево до границата, но прво мора да се изгради објектот на тунелот, информираат од Министерството за транспорт.
Бугарскиот министер за регионален развој и јавни работи Иван Иванов повика на забрзување и концентрирање на напорите за спроведување на проектот.
Секојдневните проблеми со кои се соочува нашата влада бараат големо внимание и итен одговор. Во исто време, сепак, не треба да го изгубиме фокусот на стратешките цели кои можат да ги одведат нашите земји на друго ниво. Тоа е темата со Коридорот 8, рече Иванов.
Развојот на основната инфраструктура, вклучувајќи ја и железничката врска со Република Северна Македонија, според бугарскиот министер за одбрана Атанас Запријанов е од особено значење за Бугарија и треба да се направи се што е можно за да се постигне видлив напредок во краток временски период.
Воената мобилност е приоритет за нас. Бугарија го поддржува понатамошниот развој на воената мобилност не само како водечки проект за соработка меѓу НАТО и ЕУ, туку и за зголемување на улогата на регионалната безбедност преку подобра поврзаност на европскиот контингент, додаде Запријанов.