Манчестер јунајтед по кој знае кој пат покажа дека наизглед невозможното е сепак возможно во фудбалската игра. И со петте тинејџери и без десетте повредени и суспендирани играчи успеа да слави кај ПСЖ со 3:1 за поништување на поразот со 0:2 на „Олд Трафорд“ и пласман во четврт-финалето во Лигата на шампиони.
Норвешкиот менаџер на клупата на премиерлигашот, Оле Гунар Солскјер и да сакаше не можеше да го сокрие задоволството од неверојатниот расплет во осминафиналниот двомеч со париските „светци“.
„Фантастично. Верата што ја полагавме во фудбалерите беше присутна. Извонредно го почнавме мечот и нашиот план се базираше први да постигнеме гол во што успеавме. Овие работи така одат во овој клуб. Тоа е Јунајтед. Се мотивиравме од Ајакс против Реал Мадрид. Рашфорд има 21 година, но нема страв во него. Тој и Лукаку се извонредни“, истакна Солскјер кој многу веројатно дека ќе остане на кормилото на Манчестер јунајтед по завршување на сезоната.
Манчестер јунајтед поведе во Париз со погодок на Ромелу Лукаку во втората минута. Белгиецот се впиша во листата на стрелци и во 30. минута, откако Бернат во меѓувреме израмни на 1:1. Резултатот остана непроменет до судиското продолжение на средбата во кое Кимпембе играше со рака во сопствениот казнен простор, а по прегледување на ВАР снимката, главниот судија Дамир Скомина досуди пенал за „црвените ѓаволи“ што во гол го претвори Маркус Рашфорд.