Нашата земја во моментот се соочува со нов бран на вирусот посилен од првиот што дојде како последица на олеснување на рестрикциите, но повеќе како последица на серија настани, семејни собири и прослави на кои не се почитуваа препорачаните мерки за носење на заштитна маска, за одржување на дистанца и дезинфекција и често миење на рацете. Ова го истакна министерот за здравство, Венко Филипче на денешната прес-конференција на која, сепак, потенцира дека здравствениот систем е целосно прилагоден на новата состојба.
„Но, тоа што е најважно е поддршката од граѓаните, целосното почитување на мерките и солидарноста. Ако ова го имаме, многу брзо ќе ја надминеме оваа состојба. Сега кога во целост постепено се враќаме кон редовните животни активности повеќе од кога било е важно сите да дадеме свој придонес во спречување на ширење на вирусот. Сите сме заедно во оваа битка и секој еден од нас е важен“, посочи Филипче на прес-конференцијата.
Светската здравствена организација (СЗО), нагласи Филипче, е наш стратешки партнер генерално во многу сегменти во здравството, а уште повеќе сега откако и ние се соочуваме со овој голем светски здравствен предизвик.
„Претставничката на СЗО во Скопје, Џихан Тавила сите овие четири месеци дава огромна подршка на нашиот систем во справување со вирусот за што сакам да изразам голема благодарност. Локалната канцеларија на СЗО е во секојдневна комуникација со Министерството за здравство, со членовите на Комисијата за заразни болести, како и со многу други чинители во овој процес. Оваа поддршка во консултации, препораки, донации која ја добиваме од СЗО освен тоа ни одава и признание за напорите, трудот, неуморната работа на здравствените работници, институциите и власитер во справување со вирусот“, рече Филипче.
Уште кога кон крајот на јанари СЗО прогласи вонредна состојба, посочи министерот, ја интензивиравме оваа наша меѓусебна комуникација, ги преземавме сите мерки и препораки кои ги издаде институцијата и го подигнавме нивото на будност на повисоко ниво дури и пред да го регистрираме првиот случај во нашата земја.
„Во периодот кој следеше воведувавме димензионирани мерки со цел да го заштитиме здравјето на граѓаните и да го амортизираме ударот кон нашиот здравствен систем. Редовно информираме за статистиката, во континуитет споделуваме препораки и други важни информации, за да ја подигнеме свеста во заедницата за вирусот, неговото присуство и мерките за заштита на граѓаните“, додаде Филипче.