Поранешниот прв хрватски тениски рекет, Горан Иванишевиќ (47) се вклучува во стручниот штаб на Новак Ѓоковиќ за годинашното издание на Вимблдон. Лондонскиот гренслем стартува утре, ќе трае до 14 јули и ќе се игра за награден фонд од 38 милиони фунти.
Иванишевиќ, кој го освои Вимблдон во 2001 година, ќе има советодавна улога во тимот на моментно водечкиот на АТП листата, но притоа ќе се обиде да пренесе и дел од сопственоото искуство кон Ѓоковиќ бидејќи тенискиот свет го памети како еден од најдобрите играчи на трева.
Соработката меѓу Иванишевиќ и Ѓоковиќ е плод на нивното долгогодишно пријателство и засега е неформална и краткорочна. Меѓусебниот договор е постигнат за првата натпреварувачка недела на турнирот по што, како што објавуваат медиумите, Хрватот ќе мора да замине од Лондон поради неодложни обврски.
Главен тренер на Новак Ѓоковиќ останува Марјан Вајда. Иванишевиќ, пак, досега беше тренер на сонародникот Марин Чилиќ, на Чехот Томаш Бердих и на Канаѓанецот Милош Раониќ.