Враќање на старите имиња на улици, плоштади, мостови и булевари од времето на екс градоначалникот Коце Трајановски, побара советничката групата на ВМРО-ДПМНЕ на денешната седница на Советот на Град Скопје.

Барањето за поништување на одлуката за именување на улици, мостови, булевари и плоштади во мандатот на Петре Шилегов го испорача Марија Андоновска.

Одлуката од претходниот состав е донесена во несоодветен момент, пред изборите и во неа има низа неправилности, недоречености и, според напи сознанија, фали извесна документација. Затоа бараме поништување на таа одлука“, рече Андоновска од таборот на ВМРО-ДПМНЕ.

На тоа реагираше Љубица Јанева од СДСМ која нагласи дека старите имиња на улици не може да се вратат со поништување на веќе донесена одлука, туку дека е неопходна нова одлука за именување на улици што треба да мине и во Влада.

И покрај забелешката на Јанева, претседателот на Советот на Град Скопје, Трајко Славески ја вметна предложената точка во дневниот ред. Позитивно по неа се изјаснија 24 советници од ВМРО-ДПМНЕ, од Левица и од Алијанса за Албанците.

Градоначалничката Данела Арсовска не искажа став на седницата дали е потребно заменување на сегашните 570 имиња на мостови, улици, плоштади и булевари со претходните.