Србија и Хрватска ги добија најатрактивните можни противници на Светското првенство во Русија догодина. Ждрепката во Кремљ што заврши предмалку ги смести „коцкестите“ во групата Д заедно со Аргентина, Исланд и Нигерија, а северниот сосед ќе игра во Е конкуренцијата со Бразил, Швајцарија и Костарика.
Хрватите во премиерниот меч ќе се соочат со Нигерија (16 јуни, Калининград), со „гаучосите“ на Лионел Меси ќе се пресметаат на 21 јуни во Нижни Новгород и во третото коло, на Ростов на Дон на 26 јуни, ќе се судрат со дебитантот на мундијалските турнири, Исланд.
Најдобрите српски фудбалери, пак, настапите во Русија ќе ги почнат против Костарика на 17 јуни во Самара, нивни ривал во второто коло, на 22 јуни во Калининград, ќе биде селекцијата на Швајцарија, а на 27 јуни и против Бразил во Москва.
Светското првенство во Русија ќе биде отворено со натпревар меѓу домашната репрезентација и Саудиска Арабија на 14 јуни на стадионот „Лужники“ во Москва.
Фудбал – СП 2018 во Русија
Група А: Русија, Саудиска Арабија, Египет, Уругвај
Група Б: Португалија, Шпанија, Мароко, Иран
Група Ц: Франција, Австралија, Перу, Данска
Група Д: Аргентина, Исланд, Хрватска, Нигерија
Група Е: Бразил, Швајцарија, Костарика, Србија
Група Ф: Германија, Мексико, Шведска, Јужна Кореја
Група Г: Белгија, Панама, Тунис, Англија
Група Х: Полска, Сенегал, Јапонија, Колумбија