Премиерот Оливер Спасовски, вицепремиерот Бујар Османи, министрите за здравство, односно образование, Венко Филипче и Арбер Адеми како и Владимир Милошев, државен секретар во министерството за здравство, се повлекуваат во домашна изолација. Ваквата нивна одлука доаѓа по информацијата дека градоначалникот на Куманово, Максим Димитриевски, со кој вчера имаа состанок во општинската зграда, е позитивен на ковид-19.
Вицепремиерот за европски прашања во Владата, Бујар Османи на својот Фејсбук профил објави дека се повлекува во самоизолација до вторник кога, според протоколите, ќе се подложи на тестирање за коронавирус. Од таа причина тој го откажа учеството и на денешната седница на Советот за безбедност кај претседателот Стево Пендаровски.
Османи, заедно со премиерот Оливер Спасовски, министрите за здравство, односно образование, Венко Филипче и Арбер Адеми и претседателот на Комисијата за заразни болести, Жарко Караџовски вчера присуствуваа на состанок во Куманово на кој, со тамошниот Кризен штаб, се разгледуваше ситуацијата со коронавирусот во Општината.
„Иако цело време бев носев маска и ракавици што според епидемиолозите е доволно за заштита, речив да не присуствувам на седницата на Советот за безбедност кај Претседателот и да се повлечам во самоизолација до вторник кога, според протоколот, треба да биде направено тестирање. На градоначалникот на Куманово и на сите заболени лица им посакувам што поскоро закрепнување, но и сите заедно што поското да излеземе од оваа ситуација“, напиша Османи на Фејсбук.
Филипче: Од денеска сум во домашна изолација
И министерот за здравство Венко Филипче се огласи преку Фејсбук со објава дека ќе биде во домашна изолација, откако кај кумановскиот градоначалник со кого имаше контакт вчера е потврдено присуството на коронавирусот.
„По информацијата дека градоначалникот на Куманово, Максим Димитриевски, кој вчера одржа состанок на кризниот штаб на Куманово на кој присуствував и јас, е позитивен на ковид-19, од денеска ќе бидам во домашна изолација. На состанокот ги почитував сите протоколи за заштита и носев заштитна опрема исто како и останатите присутни. Ги очекувам епидемиолозите од Институтот за јавно здравје кои освен со мене, ќе направат епидемиолошки анкети и со сите други функционери во Владата кои вчера беа присутни на состанокот. До добивање на епидемиолошка проценка на ризикот и насоки за понатамошно постапување останувам во изолација“, напиша Филипче.
Работата на Министерството за здравство, како што информира Филипче, продолжува непречено да се одвива, а тој преку онлајн платформи ќе остане во редовна комуникација со Комисијата за заразни болести и со сите останати инволвирани во процесот.
„Ние го имавме предвид и се подготвуваме и за ова сценарио. Работата на Министерството за здравство продолжува да се одвива непречено, а јас и од изолација останувам во редовна комуникација со Комисијата за заразни болести и сите останати инволвирани во овој процес и продолжувам да ги координирам сите процеси во справување со кризата. Како и досега, Министерството за здравство редовно и навремено ќе информира за состојбата со коронавирусот во земјата, а моите прес конференции ќе ги правам преку достапните онлајн платформи за оваа намена. Во текот на денот ќе се воспостави техничка можност за ова за да нема застој во однос на информирањето“, вели Филипче во Фејбук статусот.