Мохамед Салах покажа зошто е египетски фудбалски фараон, омилена фигура во земјата на пирамидите во која доби преку еден милион гласови на последните претседателски избори (на толку неважечки ливчиња беше додадено неговото име), но и омилен лик меѓу навивачите на Ливерпул. Дека е еден од најдобрите фудбалери во моментот во светот, а можеби и најдобар покажа против неговиот поранешен клуб Рома во првиот полуфинален меч во Лигата на шампиони. Постигна два гола и запиша две асистенции во убедливата победа на „црвените“ со 5:2 што ги прави, речиси, финалисти во елитното клупско натпреварување.
Галопирачката брзина со која составот на Јирген Клоп тргна кон Киев, градот што УЕФА го одбра за промоција на континенталниот клупски фудбалски владетел за оваа сезона, сепак, успеа да го забави Рома и со два гола во финишот на средбата да задржи каква-таква отвореност на реваншот на „Олимпико“ на 2 мај. Римјаните на крајот може да бидат дури и задоволни и покрај петте примени гола на „Енфилд“ и барем седум дена да сонуваат за реприза на сензацијата што ја приредија против Барселона во четврт-финалето. Одиграа криминално лошо во одбраната со која Египќанецот едноставно си поигруваше како со лего коцкички и вистинско чудо е што не тргнуваа од центар на тревникот во Ливерпул уште најмалку два-три пати.
https://www.youtube.com/watch?v=PY-H4MdVR-g
Салах погоди во 36. минута и во првата од судиското екстра време на првиот дел по асистенции на Фирмињо, му возврати на Бразилецот со додавање за реализација во 61. минута, претходно, во 56. минута, и за Мане. Петтиот погодок за Ливерпул беше дело на Фирмињо во 69. минута по асистенција на Милнер. И тука застана „мелењето“ на калчолигашот. Ростерот на Клоп како да се задоволи со дотогашниот ефект, па нешто поопуштената игра ја искористија гостите од Рим кои со два гола избегнаа нов дебакл на Островот налик на оној од Манчестер јунајтед (7:1) пред неколку години. Во живот ги остави Един Џеко со голот во 81. минута на кого се надоврза и Пероти по четири минути од пенал што го изнуди Раџа Најнголан.
Во второто полуфинале во шампионската Лига ќе разигруваат Баерн Минхен и Реал Мадрид. Првиот судир од двомечот е вечерва (среда) од 20.45 часот на „Алијанц арена“.