Published: Thursday, August 6, 2020 13:34
Претседателот на СДСМ, Зоран Заев на денешната средба со германската амбасадорка во земјава, Анке Холштајн информира дека неговата партија е во сериозни разговори за формирање ново, стабилно парламентарно мнозинство и нова Влада што ќе работи во интерес на граѓаните. Врвни приоритети на новата влада, како што истакна тој, ќе бидат развој и унапредување на економијата, како и реформи во правосудството.
„Водиме процес на разговори преку кои ќе обезбедиме сигурно и стабилно парламентарно мнозинство преку кое ќе обезбедиме нова и одговорна Влада со полн четиригодишен мандат. Развој и унапредување на економијата и реформи во правосудството ќе бидат врвните приоритети на новата Влада предводена од СДСМ и тоа ќе го покажеме уште во првите сто дена од мандатот“, нагласи Заев.
Освен за актуелната политичка ситуација во државата и евроинтегративниот процес, на средбата се разговараше и за состојбата со коронавирусот, како и за односите меѓу двете држави. Лидерот на СДСМ рече дека земјава нема поголем пријател и посилен поддржувач на евроатлантскиот пат од Германија.
„Благодарни сме за поддршката што сите овие години ја добиваме од Германија, не само од канцеларката Ангела Меркел, туку и од министри за надворешни работи, од членови на Бундестагот, од германски европратеници. За нас е чест и привилегија на европскиот пат да имаме силен и искрен сојузник како што е Германија. Убедени сме дека преку реформите, преку Берлинскиот процес кој за првпат ќе го водиме ние како држава кандидат, дека ќе ги дадеме сите аргументи за отворање на почнување на преговори, додека трае германското претседавање со Унијата“, порача Заев.