Во основното, во средното и во високото образование од година на година се намалува бројот на ученици во влезната генерација како и вкупниот број на ученици, односно студенти. Најголем пад од 23,6 отсто, за период од десет години, е забележан кај бројот на запишани средношколци.
Во публикацијата „Северна Македонија во бројки, 2020“, што неодамна ја објави Државниот завод за статистика, во податоците за образованието во земјава е наведено дека во учебната година 2008/09 имало 94.387 средношколци, пет години подоцна (2013/2014) бројот паднал на 86.936, а намалувањето продолжило и во наредните пет години, па бројот на запишани средношколци во учебната 2018/19 изнесувал 72.123.
Во истиот период, пак, има зголемување на бројот на наставници и на средни училишта. Пред 11 години имало 6.720 наставници во средното образование за тој број да порасне на 7.597 во учебната 2018/19. Во учебната година 2008/09, пак, биле евидентирани 114 средни училишта, во 2013/14 имало пет повеќе (119), а во 2018/19 година да достигне до 138.
Опаѓање на бројот на запишани ученици има и во основното образование и тоа 13,1 отсто во учебната 2018/19 година во споредба со 2008/09 година.
Бројот на основци во учебната 2008/09 година бил 217.685, во 2013/14 паднал на 192.152, а негативниот тренд продолжил и во 2018/19, па настава во основното образование следеле 189.236 ученици. Намалување е забележано и во бројот на основни училишта – пред 11 години ги имало 1.052 или десет повеќе во споредба со учебните години 2013/14, односно 2018/19.
Иако се бележи намалување на бројот на ученици и на училишта, сепак, се бележи и зголемување на бројот на наставници во основното образование – во учебната 2008/09 ги имало 16.249, во учебната 2013/14 за околу 1.300 повеќе или поточно 17.549), како и во учебната 2018/19 во која предавале 18.580 наставници.
За 15,4 отсто е намален и бројот на запишани студенти. Во академската 2008/09 година биле запишани 63.437, во 2013/2014 ги имало 57.746, а во 2018/19 продолжил опаѓалкиот тренд на 53.677 студенти. И во високото образование низ годините се бележи зголемување на бројот на професори. Во академската 2008/09 година ги имало 2.182, во 2013/14 предавале 2.301 додека настава во студиската 2018/19 држеле 3.101. Овој податок на ДЗС се однесува само на наставниците, не и на соработниците во наставата.