Задоволство од таборот на македонската репрезентација по стартната победа на Светското ракометно првенство во Германија. Јапонија е архивирана на начинот каков се посакуваше, од резултатски аспект пред се. Остварен е убедлив триумф со средно трошење на силите што дојде како последица на брзата игра што ја негуваат и практикуваат популарните „самураи“. Конечни 38:29 (полувреме 18:13), пробиена е прихолошката бариера за многу покомотно дочекување на наредниот предизвик наречен Бахреин.

„Одиме, како што најавивме, чекор по чекор, без грч и без залетување. Друг избор немаме. Нема потреба од такво нешто. На Светско првенство сме, форматот нуди голем број на мечеви. Со Јапонија минавме релативно лесно, но не беше така и на терен“, се првите импресии на Стојанче Стоилов по воведниот мундијалски час игра на Македонија во Минхен.

Победа си е победа и покрај пропустите, пред се, во одбрана што се провлекоа во текот на средбата. Среќна околност е што не се одразија на конечниот исход и што се запишани првите бодови во групата Б. Следува ден пауза за ракометарите, па меч со Бахреин во кој, исто така, важат за фаворити пред трите сериозни предизвици во кои ќе се бара и шанса за прогрес во главната групна фаза.

„Јапонија е зад нас. Пред нас е Бахреин. Имаме 48 часа за одмор и за анализа. Фаворити сме и во тој втор меч на Светското првенство што нема да биде случај во трите што ќе следуваат, а во кои ќе одиме на се или ништо. Се надевам дека во недела ќе биде полесно за шанса да добијат и помладите и дебитантите за сите да почувствуваат како е на големо натпреварување“, додаде Стоилов.

Стоилов постигна седум гола против Јапонија и беше прогласен за најкорисен играч на натпреварот.