Стојанче Стоилов ќе остане забележан во историјата како капитен на тимот што ѝ го донесе на Македонија првиот европски шампионски трофеј во клупскиот ракомет. Фајналфор турнирот во Келн го заврши без постигнат гол, но неговиот придонес во бедемот пред Арпад Штербик беше за чиста десетка. Беспоштедно се бореше со противничките играчи на Барселона и на ПСЖ, машки го издржа „ќотекот“ од нив и беше непоколеблив во дуелите и во затворање на приодите кон голот.
„Горд што сум капитен на овој тим. Момците покажаа карактер. Македонскиот машки ракомет за првпат во историјата освојува ваков медал. Не можам да објаснам како се чувствувам, веројатно исто се чувствуваат сите што беа со нас и во полуфиналето и во финалето“, рече Стоилов по големата победа во финалето.
Вардарци одиграа два инфаркт натпревара во „Ланксес арената“ во Келн. Двата ги добија со последниот замав, заслужено го подигнаа трофејот за дефинитивна потврда дека нивното учество на завршниот турнир не беше случајно туку дојде како плод на макотрпна работа на долг рок.
„За финалето знаевме дека ќе биде исто како и полуфиналето. Барселона и Париз се екипи со иста сила, со ист квалитет. Знаевме што треба да правиме, правевме и успеавме. Се боревме цел натпревар, одбраната и голманот пресудија како што се надевавме и очекувавме. Тоа е основа во ракомет. Се надевам дека го израдувавме цел град и цела Македонија“, дополни вардаровиот капитен.