Повеќе турски офицери барале азил во земјите членки на НАТО за време на “чистките” на турската власт по пучот на 15 јули годинава, објави денес генералниот секретат на алијансата Јенс Столтенберг. Барањата за азил биле поднесувани во земјите во кои тие офицери биле на служба.
Столтенбер оваа изјава ја даде во Брисел на два дена пред неговата на посета на Турција. Тој не сакаше да прецизира за колку офицери станува збор ниту пак во кои земји бил баран азил.
Досега беше објавено дека осум турски војници избегале во Грција на 16 јули, ден по неуспешниот пуч во Турција. Анкара побара нивна екстрадиција. Војниците побараа азил во Грција но нивните барања беа отфрлени. Војниците поднесоа жалба на оваа одлука и во моментов се чека одлуката на грчката правда.
Освен тоа повеќе турски офицери од базата на НАТО во Рамштајн, Германија, исто така побараа азил, објавија вчера германските медиуми.
Многу турски функционери и војници избегаа од Турција по неуспешниот пуч и “чистката” на турскиот режим. Во Германија 4,437 турски државјани побарале азил помеѓу јануари и октомври 2016 година што е повеќе од двојно повеќе од истиот период во 2015 година кога азил побарале 1.767 турски државјани.
Според Столтенберг, секоја земја членка на НАТО сама одлучува дали да даде азил или не а НАТО нема никаква одговорност во тоа, изјавил првиот човек на алијансата за агенцијата АФП. Тој додаде дека “одреден број членови на турскиот воен персонал во структурата на команда на НАТО беа сменети”.
Земјите членки на НАТО се исправени пред предизвика кога офицер на земја членка на НАТО бара азил. Турција е со децении значајна членка на алијансата што само по себе значи дека станува збор за демократска држава чии што државјани немаат право на азил. Но, од неуспешниот пуч на 15 јули 2016 годинава и илјадниците војници, новинари или функционери отпуштени или уапсени и осомничени дека се дел од пучот, евро-атлантскиот поглед врз Турција почнува да се менува.
Столтенберг во недела патува за Истамбул каде ќе зборува пред парламентарното собрание на НАТО, структура во која учествуваат парлементарците од земјите сојузници.