Околу еден час траеше денешниот обид за отпочнување на рочиштето за случајот „Труст“ во кој првоосомничен е бизнисменот Сеад Кочан и уште две физички и три правни лица, меѓу кои и управителите на фирмите „Трансмет“, „Силекс“ и „Вато“ ДООЕЛ од Студеничани за учество на тендер на Електрани на Македонија.
Рочиштето е сепак одложено за 14.ноември.
Во судницата денеска беа присутни обвинителите од СЈО, Гаврил Бубевски и Артан Ајро, сите обвинети, како и претставниците на правните лица со својата одбрана.
Сепак при самиот почеток, адвокатката од одбраната, Сања Алексиќ рече дека кај нив ја нема комплетната документација од обвинителниот акт, односно дека тие не ја добиле листата со докази на која треба да предложат свои.
Веднаш по неа, Бубевски од СЈО пред судијката Лидија Трајковска Зимбовска рече дека СЈО ја завршиле својата работа со тоа што до Советот за утврдување на обвинителниот акт ја поднеле целата документација и тоа во неколку примероци, но дека пропуст е на Судот што не ја доставил до одбраната.
По речиси половина час убедување чија била грешката, обвинителите и адвокатите од одбраната разменија УСБ материјали со листата на докази, така што судот го закажа рочиштето за 14.ноември.
Според обвинението, осомничените со фалсификувани документи местеле тендери во ЕЛЕМ во вредност од 17 милиони евра.
Предметот, како што објави СЈО, е оформен врз основа на три прислушувани разговори, од кои два необјавени во јавноста од 3.8.2011 и 6.10.2011 година.
По двомесечното бегство, откако му беше одредена мерка притвор, Кочан се врати во земјава и си ја обезбеди слободата со гаранција од близу еден милион евра во движен и недвижен имот.
Фирми на Сеад Кочан и Љубисав Иванов – Ѕинго под истрага на СЈО
На 18 октомври Основниот суд Скопје 1, го прифатил обвинителниот акт за случајот „Труст“, во кој првообвинет е бизнисменот и сопственик на ТВ Нова, Сеад Кочан. Обвинението за „Труст“ е напишано на 57 страници, од кои на 50 се наведени доказите. СЈО за овој случај навело и сослушување сведоци.