Антонио Кочков беше вториот денешен сведок, покрај премиерот Оливер Спасовски, во рочиштето за упадот и насилствата во Собранието на 27 април во 2017 година. Како член на ВМРО-ДПМНЕ и вработен во ЈП „Државни патишта“, тој даде исказ за настаните во денот познат и како „крвавиот четврток“. Истакна дека на протестите под мотото „За заедничка Македонија“ учествувал 10 до 15 пати, а за координација на активностите (кога и каде) служела група на Вибер.
Зборното место пред протестот на 27 април, како што рече, било пред Музејот на ВМРО, но тој не присустувал. Истакна оти не знаел кој ги дава насоките за кого или кои рече „некои поглавни од мене“ кои биле поупатени во ситуацијата.
„Пред Музејот на ВМРО тој ден не бев, како и на протестот. Пред Собранието пристигнав, откако беше извршен упадот. Вратите беа отворени и влегов внатре. Бев во холот, а потоа и во салата во која се одржуваат седници. Имаше луѓе од партија кои мораше да ме видат, бидејќи ми помогнаа при вработувањето, па моето присуство требаше да биде како благодарност. Бидејќи беше топло и ме видоа, па сакав да си одам и на одење рекоа дека некои може да останат во пленарната сала, а некои може да одат во друга просторија во која беа пратениците од новото мнозинство“, рече Кочков во дел од денешното сведочење во Кривичниот суд.
Запрашан кој е тој што требало да забележи негово присуство во Собранието, тој одговори дека имало луѓе од партијата кои му помогнале од инкасатор да се врати на работа во Дирекција и дека во Собранието влегол за да биде виден и за да се заблагодари, но и бидејќи ги поддржувал протестите. Притоас сведочеше оти „не знае дали ВМРО-ДПМНЕ го организирала протестите, но знае дека партијата јавно ги поддржувала“.
Пред Кочков, во својство на сведок за „27 април“ во Кривичниот суд денеска се појави и техничкиот премиер Оливер Спасовски.
Наредното рочиште за случајот е закажано в петок, кога ќе сведочи пратеникот Весел Мемеди и Стефан Младеновски, кој беше обвинет во претходниот случај за 27 април, но потоа доби амнестија. Под обвинение за организацијата на случувањата од 27 април во 2017 година се поранешниот претседател на Собранието, Трајко Вељаноски, ексминистрите Миле Јанакиески и Спиро Ристовски и поранешниот директор на УБК, Владимир Атанасовски.